Х.Баделхан: 2018 он маш их ажилтай, завгүй жил байх болно


Эдийн засгийн хямралын сүүдэр хамгийн хүндээр тусч буй гол салбаруудын нэг бол яах аргагүй барилгын салбар. Зөвхөн хямралыг даван туулах бус, барилгачдыг мэргэшүүлэх, мэргэжлийн зэргийг нь ахиулах, давтан сургах, ажил эрхлэх тусгай зөвшөөрөл олгох гэхчлэн төрийн зарим чиг үүргийг мэргэжлийн холбоодод шилжүүлэх, ипотекийн зээлийн эх үүсвэрийг нэмэгдүүлэх, хот суурин газрын дэд бүтцийг сайжруулах, томоохон хотуудын цэвэрлэх байгууламжийг шинэчлэн барих гээд шийдэх ёстой олон асуудал энэ их айлын өмнө тулгарч буй.

Өмнөх Засгийн газруудын үед яригдсан, батлагдсан хэдий ч хэрэгжилт нь удааширсан, хөрөнгө мөнгөгүйн улмаас гацсан гээд бэрхшээл дагуулаад байсан зарим төсөл хөтөлбөр, шийдвэрийг эхлүүлэх гэж байгаа гэсэн нааштай сураг сонссон учир УИХ-ын гишүүн, Барилга, хот байгуулалтын сайд Х.Баделхантай уулзаж ярилцлаа.

 

-Сайдын албанд томилогдсон даруйдаа нэн даруй шийдэх ёстой чухал асуудал юу байв? 

-Энэ ажлыг дөнгөж авуутаа нөхцөл байдлыг бүрэн мэдрэх, мэдээлэл авах зорилгоор салбарын төрийн болон төрийн бус мэргэжлийн байгууллагууд, үе үеийн удирдлагууд, яам, харьяа байгууллагуудын хамт олонтой уулзаж, тэдний санал бодлыг сонслоо. Уулзалтуудын үеэр анхаарал татсан, яаралтай шийдвэрлэх шаардлагатай, салбарт тулгамдаж буй асуудлуудыг ээлж дараатайгаар шийдвэрлэн хэрэгжүүлэхээр ажиллаж байна. 

Барилга бол улс орны их бүтээн байгуулалтын тэргүүлэгч томоохон салбар, бас тэрхүү ачааны хүндийг хувийн хэвшлийнхэн үүрч явдаг онцлогтой. Ийм нөхцөлд салбарын яам нь тэдний бүтээн байгуулалтуудыг зөв зохистой, норм, стандартын дагуу хэрэгжүүлэх бодлого баримталж, Барилгын тухай хууль болоод холбогдох дүрэм журмуудыг байнга боловсронгуй болгож сайжруулах, мөрдүүлэх учиртай. Түүнээс гадна хувийн хэвшил дангаараа авч явж чадахааргүй томоохон төсөл хөтөлбөрийг ч манай яам хариуцан ажиллаж байгаа. Тухайлбал, Монгол улсын хүн амын нутагшил, суурьшлын тогтолцоо, хөгжлийн асуудал, гэр хорооллын дахин төлөвлөлт, иргэдийг орон сууцжуулах хөтөлбөр, мөн тус яаманд тухайлан хариуцуулсан Улаанбаатар хотын төв цэвэрлэх байгууламжийг шинэчлэх, бохир усыг цэвэршүүлэх төслийг ойрын хугацаанд эхлүүлэх зэрэг томоохон ажлуудыг хүлээн авч, нэлээдийг нь амжуулах гэж хичээлээ.



Мөн төрийн захиргааны байгууллагын чиг үүргийн дагуу  шийдвэрлэгдэлгүй удсан, хугацаа алдаж байсан ажлууд,  мөн төрийн зарим ажлыг төрийн бус байгууллагаар гэрээний дагуу хийлгэх асуудлуудыг шийдвэрлэснээр төрийн байгууллага, аж ахуйн нэгж, төрийн бус байгууллагын ажлын ачааллыг тэнцвэржүүлэх эхлэлийг тавьж, хариуцах эздийг тодорхой болголоо. 

Ярилцлагын дэлгэрэнгүйг "БАРИЛГА.МН" сэтгүүлийн №92-оос уншина уу.

Сэтгэгдэл

Сэтгэгдэл бичих




Сэтгэгдлүүд (0)